ZAMBOANGA CITY—Ya alcansa serca un milion de peso balor de “bouncing cheque” el ya lleva el dueño del un tienda na Tetuan Police Station y ya hace el reclamo contra conel diila suqui paroquiano quien ya empesa saca maga materiales de construccion y ya paga cheque que nohay fondo na banco.
Na Reclamo del tienda, que noquiere mas manda pa menciona el nombre, asegun el unu del diila paroquiano ya comensa saca differente clase de material de construccion principiando del mes de Hulio hasta del mas recientamiente, pero nohay este paga dinero y envez puru cheque ya dale na tienda, que locao na calsada del Veterans.
Pero del mas reciente, ya descubri el dueño del tienda que nohay fondo el maga cheque que ta agara sila que ya man issue el dilla paroquiano.
Cuatro del maga cheque que ta alcansa serca un milion de peso el ya lleva na Tetuan Police Station y ya usa como evidencia na plantada de reclamo.
Este dia esperanzao ay man confrontagan el dueño del tienda y el quien ya man issue el cheque donde si gende estos puede aregla el asunto, tenia que ay guinda na corte el caso. – Dan Toribio
