WALA makatambong si South Cotabato 1ST District Congressman Pedro B. Acharon Jr. sa session sa Kamara, atol sa init nga gihisgutan ang pagpaubos sa budget sa Commission on Human Rights ( CHR) ngadto sa P1,000 pesos sa tuig 2018.
Sumala pa ni Congressman Acharon sa interbyu sa RMN Gensan nga atol sa maong hearing, natigayon usab ang panagpulong sa mga LGU officials aron nga hisgutan ang isyu sa Reduction of Realty Property Tax collections nga kon diin midugay og pipila ka oras hinungdan nga wala kini naka-boto sa gihimong botasyon.
Sumala pa kang Acharon nga daghang mga rason nganong nahitabo ang pagpaubos sa budget sa usa ka ahensya.
Usa na niini ang dili pagpatim-aw sa mga representante kon dili aktibo sa mga hearings, og walay accomplishment.
Aminado ang kongresista nga imposible gyud nga makalihok ang usa ka buhatan sa gobyerno sa usa ka libo ka pesos lang nga budget.
Samtang malisod usab nga hingpit nga wagtangon ang buhatan sa CHR tungod kay kini komisyon man og usa ka independent body, apan nanghinaot kini nga unta patas ang komisyon sa pagtan-aw sa tanang bayolasyon sa tawhanong katungod, og dili lamang tan-awon ang mga abuso nga ginahimo sa mga kapulisan.
