Davao Occidental gitay-ug og magnitude 5.7 nga linog

Davao City – Perteng hadluka sa pamilyang Alegria sa dihang mitay-ug ang magnitude 5.7 nga linog sa Jose Abad Santos, Davao Occidental bandang 8:24 kagabii.

Sa pakighinabi sa DXDC RMN Davao sa usa ka Joselito Alegria sa Sagrada Familia sa Brgy. Hall, Poblacion, Sta. Maria, Davao Occidental, giingon niini nga nabati nila ang linog diin samtang nangaon sila kalit nga mitay-ug ang kusog nga linog gani natagak usab ang pipila sa ilang mga gamit sama sa TV.

“Kusog-kusog pud, hadlok kaayo… Nanggawas dayon mi kay basin manliki ang yuta,” segun ni Alegria.


Hinuon luwas man usab ang iyang pamilya apan wa pa kini masayod bahin sa ubang mga damyos ug kahimtang sa uban.

Subay sa datos sa PHIVOLCS, tectonic ang tinubdan sa linog diin nabati usab ang pipila ka aftershocks hangtod alas 3 Biyernes sa kadlawon.

Sa maong pagtay-ug, natala ang Intensity IV sa Malungon, Sarangani, Intensty II – General Santos City; Tupi, South Cotabato; Kiamba, Sarangani ug Intensity I – Gingoog City.

Samtang gipaningkamutan sa sibyahanan nga makuha ang linya ug update sa Office of Civil Defense Region XI bahin sa kahimtang human ang kusog nga pagtay-ug.

RadyoMaN Renz Barbarona

Facebook Comments