Atol sa sesyon sa Sangguniang Panlungsod niadtong Hunyo 2, gipresentar sa East West International Education Specialist Inc. (EWIES), sa pagpanguna ni President/Chief Executive Officer Dennis Franco M. Layug ug partner niini nga si Jeffrey Peter, ang duha ka 3-ft. AI-powered humanoid robots aron ipakita ang ilang mga abilidad ug potensyal nga mahimong kabahin sa operasyon sa lokal nga gobyerno. Gisulayan usab sa mga konsehal ang mga robot pinaagi sa pagpangutana aron masuta ang ilang kapasidad sa pagtubag ug pakigkomunikar.
Matud ni Councilor Bonz Andre Militar, chairperson sa Committee on Information Technology, gitinguha nga masugdan ang paggamit sa AI robots sa Davao City sa sunod tuig aron mapadali ang mga proseso sa gobyerno ug mapauswag ang serbisyo publiko. Gipasabot niya nga dili pulihan sa AI ang mga empleyado, kondili mahimong magamit aron mamenosan ang oras nga gigugol sa taas nga linya, pagbalik-balik sa papeles ug administrative tasks, ingon man makapokus sila sa mas importante ug episyenteng pagserbisyo sa katawhan.
Kon mapadayon ang maong direksyon, posible nga mamahimong sentro ang syudad sa kabag-ohan alang sa public safety, disaster response task force ug tinubdan sa impormasyon.
Apan sa karon, naka-standby una ang alokasyon sa budget niini gumikan kay kinahanglan, matud pa, nga ipailawom una kini sa committee hearing.
RadyoMaN Kareen Beltran
