DCOTT: Bus companies nga magpasakay sa bus stops silotan

Davao City – Nagpahimangno ang Davao City Overland Transport Terminal (DCOTT) nga adunay silot nga ipahamtang sa mga kompanya sa bus kung makalapas kini sa gipatumang suspensyon sa pagpasakay sa mga pasahero sa bus stops sa dakbayan sa Davao.

Sa interbyu sa DXDC RMN Davao kang Aiza Usop, manager sa DCOTT, gibutyag niini nga isyuhan sa Land Transportation Franchising and Regulatory Board (LTFRB) og temporary operator’s permit (TOP) ang violators, diin nasayrang adunay mga reports nga nagapasakay gihapon karon og pasahero sa bus stops luyo sa gipagawas nga direktiba.

“According sa iyaha (LTFRB Director Atty. Nonito Llanos III) naa syay mga staff nga ginapa-deploy ug (naga) surprise monitoring pud diha sa mga areas (bus stops). Matud niya ang penalty ana is isyuha gyud sila’g TOP,” sulti ni Usop.

Dugang sa DCOTT manager, makig-alayon usab kini sa City Transport and Traffic Management Office (CTTMO) traffic enforcers aron matutokan ang mga violator o nagapasakay nga bus sa bus stops.

Kahinumduman, ang palisiya gipatuman alang sa seguridad human sa pagpamomba sa usa ka bus sa Koronadal City, apan kini temporaryo lamang samtang anaa pa sa red alert status ang awtoridad.

RadyoMaN Kirby Manzon