. DSWD 12 nagapatigayon sang monitoring sa mga 4Ps beneficiary matapos ang pagtaas sang ila ayuda.

27

Nagapatigayon sa subong sang hugot nga monitoring ang Department of Social Welfare and Development Office ukon DSWD 12 sa masobra 250 thousand ka mga pamilya nga myembro sang Pantawid Pamilyang Pilipino Program ukon 4Ps sa rehiyon dose.
Ang nasambit nga tikang sang ahensya ang matapos nga ma-waived sang pito ka bulan ang mga kondisyon sang gobyerno tungod sa COVID-19 pandemic.
Suno kay DSWD 12 Regional Director Cezario Joel Espejo, lakip sa mga ini ang pagpaeskwela sa mga bata, pre kag post natal care sa mga buntis, regular kag preventive check-up sa mga bata nga yara sa lima ka tuig panubo, pagpurga sa mga bata nga yara sa 14 years old panubo kag pagtambong sang mga ginikanan sa bulanan nga Family Development Session.
Ginpahayag ni RD Espejo nga sa subong pwede na nga magbisita sa mga health center ang mga 4ps beneficiary basta siguraduhon lamang nga nasunod ang minimum health protocols sa COVID-19.
Ang nasambit nga pahayag ni Espejo ang kadungan sa pagkumpirmar sini sa pagtaas sang ayuda sang mga 4Ps beneficiary.
Suno pa sa regional director ang mga bata nga enrolled sa junior high school ang makabaton sang tig 500 pesos kada bulan, samtang tig 700 pesos naman ang mga yara sa senior high school.
Ini suno pa ang mas mataas sang tig- 200 pesos nga nabaton nila sadto anay kag nagapabilin naman sa 300 pesos kada bulan ang ayuda sa mga bata nga enrolled sa mga daycare center.
Paklaro pa ni Espejo,ang increase sa grant sang mga 4Ps beneficiary ang kabahin sang pagpatuman sang RA 11310 nga may katuyuan nga mahatagan sang pinansyal nga bulig ang mga pigado nga pamilya.

Facebook Comments