Batan, Aklan – Nakaangkon it kapin 15 ka mga tama it pagbuno rong sangka mister matapos nga mabun-an ko anang bayaw Sabado it gabii sa Sitio Agzam, Brgy. Camaligan, Batan, Aklan.
Ro biktima nakilaea kay Rizal Venus y Tandog, 45-anyos samtang rong suspek nakilaea man kay Christopher Dalida alyas Boboy, 35-anyos tanan residente it nasambit nga lugar.
Sa pakikipag-angot it RMN Kalibo kay PInsp. Zacarias Rose, hepe it Batan PNP nga ko Sabado it gabii hay nakabaton sanda it tawag halin kay Camaligan Punong Barangay Rolly Sucgang nga may natabong pagpamuno sa andang lugar ag insigida man nga gin respondehan.
Sa andang imbestigasyon naga guwa nga bago pa man natabo rong pagpamuno hay ginhatdan it pagkaon ko asawa it biktima ro suspek sa anang baeay ugaling uwa na raya pagbatuna ag mat natabong pagsaeabtanan rayon nga hinaboy it gatong nga may kaeayo.
Umuli lang raya ag naghipos uwa man imaw nagsugid sa anang asawa pero ko ulihi nahasyran raya it biktima ag ana nga ginkompronta ro suspek ag natabo rayon ro pagpamuno.
Samtang sa panaysayon mat a ni Punong Barangay Sucgang hay nag-adto ro misis it biktima sa baeay it suspek pero hinaboy raya it suspek it gatong nga may kaeayo.
Nahakita ko unga it biktima rason nga sumugid raya sa anang tatay, inadtunan ro suspek ag ginkompronta ag natabo rong pagpamuno.
Tag nagahatod eon kunta it pagkaon ro misis it biktima hay idto nana nakita nga nagahamyangon eon ro biktima nga may mga tama ag una man sa anang kilid naga pungko rong suspek nga naghambae pa nga mag usoy it saeakyan para madaea sa hospital rong biktima.
Nahadaea pa sa hospital rong biktima pero gindeklara nga dead on arrival ko anang attending physician.
Insigida man nga naaresto rong suspek ag gin-ako naman rong krimen.
Nasayuran nga bago natabo rayang insidente hay pilang adlaw nga uwat tueog tueog rong suspek ag sigidas nga ilininum, nasayuran pa gid nga may sangkiri raya deperensya sa painu-ino ag gina abot-abot.
