Ibajay, Aklan — Sa mayad eon nga kahimtangan rong babayeng eapsag nga gin abandona sa sangka pedicab sa Sta. Rita St., Poblacion, Ibajay, Aklan.
Base sa report it Ibajay PNP nga napan-uhan raya kahapon mga alas 7:30 it agahon ko sangka eaeaki nga nakaputos it eambong sa sueod it pedicab nga nakaparking sa prente it abandonadong baeay.
Gintan-aw nana raya ag nakibot eamang imaw nga sangka eapsag ro anang nakita.
Insigida imaw nga nagpatuon sa mga residente kaeakip eon ro sangka midwife nga nagputoe ko pusod it eapsag ag dayon nga gindaea sa Ibajay District Hospital.
Ro nasambit nga eapsag hay nagabug-at it 2.5 kilos ag mayad rong pangeawason.
Uwa man raya makitai it kon ano man nga mga nina sa anang eawas.
Sa makaron hay una eon sa pag-atipan it MSWD ro nasambit nga eapasag.
Naga padayon man rong imbestigasyon it Ibajay PNP para makilaea kon sin-o ro nag-aywan ko nasambit nga eapsag sa pedicab.
