Enforcers sa 24-year Anti-smoking ordinance sa Davao, gipasidunggan sa konseho

Davao City – Gidayeg ni Konsehal Luna Acosta, Chairperson sa Committee on Public Safety and Security, ang usa ka resolusyon nga nagpasidungog sa Vices Regulation Unit (VRU), mga piling estasyon sa kapulisan, deputized enforcers, ug mga boluntaryo nga aktibong nakatampo sa pagpatuman sa Anti-Smoking Ordinance sa Dakbayan sa Davao.

Ang maong pasidungog gihatag atol sa selebrasyon sa World No Tobacco Day 2026 ug sa ika-24 ka tuig sa ordinansa.

Matud pa sa konsehal, ang World No Tobacco Day nga adunay temang “Unmasking the Appeal – Countering Nicotine and Tobacco Addiction” naghatag og gibug-aton sa nagkataas nga hulga sa tabako, nicotine, ug vape, ilabina sa kabatan-onan. Giklaro niini ang kahinungdanon sa lig-on nga pagpatuman sa balaod ug kampanya sa pagtunol og impormasyon aron maprotektahan ang panglawas sa katawhan.

Lakip sa gipasalamatan ug gipasidunggan ang San Pedro Police Station, Sta. Ana Police Station, 1st Davao City Mobile Force Company, ug Tourist Police Unit, uban sa mga organisasyon sama sa PHMI, CIS, PCCMG, GALUPPI, ug VBR. Matud sa lokal nga gobyerno, ang ilang dedikasyon mao ang nagpalig-on sa 24 ka tuig nga padayon nga kalampusan sa Davao City Anti-Smoking Ordinance.

RadyoMaN Kareen Beltran