Face mask violator nadakpan sa Oplan Kalinaw

Davao City- Arestado atol sa Oplan Kalinaw nga gilusad sa Buhangin Police Station sa Purok Santa Maria sa Barangay Buhangin ang usa ka lalake nga dunay kaso sa pagsupak sa Mandatory of Wearing Facemask Ordinance kagahapon sa buntag.

Giila ni Buhangin PNP Chief of Police Major Joenel Pederio ang dinakpan nga mao si John Dalanon, hamtong ang pangidaron, ug residente sa nasampit nga dapit.

Matud ni Pederio, ang akusado napagulaan og orden de aresto sa Korte niadto pang buwan sa Abril ug duna matud pa’y residente nakatudlo ngadto sa mga otoridad nga naa ra sa nasampit nga purok nagpuyo si Dalanon hinungdan sa iyang pagaksikop.

Nasayran, ang korte nagrekomenda og 3,000 pesos nga bail bond alang sa temporaryo nga kagawasan niini.

Suma ni Pederio, ang kapulisan nakadakop sab og 20 ka motorista nga nakalapas sa balaod trapiko sama sa wala pagsuot og helmet atol sa operasyon sa kapulisan kagahapon sa hapon.

RadyoMan Joel Viray

Facebook Comments