Capiz – Mas labi pa nga nadugangan ang numero sang mga barangay sa Capiz nga gintaup sang tubig baha bangud sang wala untat nga pag-ulan sa bug-os nga probinsya dala sang Bagyong Agaton.
Base sa pinakaulihi nga report nagikan sa Capiz PDRRMO, naglab-ot na sa 133 ka mga barangay ang apektado sang pagbaha sa mga kabanwahanan. Gintaup sang tubig baha ang 17 ka mga barangay sa banwa sang Sigma, 9 sa Maayon, Mambusao -19, Cuartero-9, Dumalag-8, Dao-20, Panit-an 26, Pontevedra-5, Dumarao-5, Panay-5, Tapaz-2 kag President Roxas-3.
Ginbaha man ang mga hulumayan lakip na ang mga provincial roads, bangud sang madalom nga tubig baha. Nagapabilin naman sa mga evacuation centers sa nasambit nga mga banwa ang 305 ka pamilya matapos gintaop sang baha ang ila poluy-an.
Ginpatuman sa naman sa pila ka mga banwa nga apektado sang pagbaha ang force evacuation sa mga residente nga nagapakatig-a sa pagbiya sa ila mga panimalay. Wala pa man sang may ginreport nga missing ukon casualty sa bug-os nga probinsya.
*Photo Credits: CADER, CASAC,PDRRMO-Aksyon Tabang*
