Davao City- Daling gidala sa balay tambalanan ang usa ka Brgy. Kagawad sa Brgy. Ihan, Kiblawan Davao del Sur human nalambigit sa aksidente sa dalan sa may Tanlawang Sulop, Davao del sur kaganinang alas 9 sa buntag.
Nahinabi sa DXDC RMN Davao ang Sulop PNP ug gikumpirma sa kapulisan nga nagbangga ang usa ka motor ug elf sa nasangpit nga dalan hinungdan nga daling gidala sa Provincial Hospital sa Digos City ang driver sa motor nga giilang si Brgy. Kagawad Noel Laurente tungod usab sa grabeng samad nga nahiaguman niini gani nakahiagum usab ug minor injuries ang angkas niini nga asawa ug anak.
Dugang sa Sulop PNP, mi-overtake sumala pa ang motor sa usa ka payong-payong ug nitabok sa pikas nga direksyon hinungdan nga mibangga ang motor sa elf.
Sa karon, balhug na sa prisohan ang driver sa elf nga giilang si Allan Borembao samtang maghimo pa usab og progress report ang kapulisan sa Sulop diin wala pa mahibal-i og unsay kasong ipasaka batok sa driver sa elf tungod ila pang kumustahon ang kahimtang sa kagawad ug storyahon ang pamilya niini.
RadyoMaN Renz Barbarona
