Kaangtanan sa ilegal nga druga, isa sa mga ginasunod nga motibo sa pagpatay sa maglive-in partner sa Mianay, Sigma, Capiz!

206

Sigma, Capiz – Patay ang mag live-in-partner matapos ginpangluthang sa sulod sang ila baligyaan sa Barangay Mianay, Sigma, Capiz pasado alas 7 sang aga.

Ang mga biktima ang ginkilala kanday Rodrigo Nepomuceno y Dunton 55- anyos ang pang-edaron kag Rondalia Sarona y Casi, 57 – anyos lunsay residente sang nasambit nga lugar.


Ang mga ini ang nag-angkon sang madamo nga kapilasan sa lawas tuga sang pusil.

Narekober naman sang mga otoridad ang napulo (10) ka baseyo sang pusil nga ginapahayag iya sang .45 caliber pistol.

Nahibaluan nga base sa imbestigayon sang mga kapulisan, bag-o gid lamang bukas sang ila tindahan ang mga biktima sang gulpi nagpalapit ang suspek kag ginpaarakan sang luthang ang mga ini.

Matapos ang insidente, madasig nga nagsakay ang wala makilala nga suspek sa isa ka Toyota Innova nga salakyan nga nagadu-ag sang gray kag nagpalagyo.
Gina-establisar pa sa subong sang mga kapulisan sang Sigma MPS kag mga katapo sang SOCO kun anu ang motibo sa pagluthang-patay sa mag live -in partner nga sanday Rodrigo Nepomuceno kag Rondalia Sarona kahapon sang aga sa Brgy Mianay Sigma Capiz.
Nahibaluan nga pareho nga bulag na sa tagsa nila ka mga asawa ang duha ka mga biktima kag nagkasugot nga magpuyo sa banwa sang Sigma.
Wala man ginadula sang mga kapulisan ang motibo nga parte sa ilegal nga druga ang kaangtanan sa kamatayon sang mga ini.
Suno sa impormasyon nga nakuha snag mga kapulisan, napreso na ang duha ka mga biktima matapos nga madakpan sa pagbaligya sang ilegal nga druga apang nakaguha lamang ang mga ini matapos nga maka-avail sang plea bargaining agreement.
Samtang aminado naman ang utod sang biktima nga si Rodrigo Nepomuceno nga nakasala ang utod sini apang ini ang nabayaran na sang biktima kag sa iya nga pagkahibalo nagapangabuhi na ini sang responsable.




Facebook Comments