Arestado si Mark Poblacion , 26 anyos sang Brgy. Concordia Sur, Nueva Valencia , Guimaras kag miyembro sang Mt. Carmel Security Agency matapos nagtuyo malagyo sa aksidente nga ginkaulamiran kag nagbato pa sa katapo sang kapulisan sang Martes sang gab-i.
Una diri gindala sa ICPO compound ang motorsiklo ni Poblacion para sa verification matapos naulamid sa aksidente sa dalan sa bahin sang Luna St., Lapaz kag nadiskubrihan nga wala sang plate number ang motorsiklo nga ginamanehar kag ginapatihan nga yara sa impluwensya sang makahulubog nga ilimnon ang suspek .
Naghingyo ang suspek sa isa ka police officer nga hulamon ang lyabe sang iya motorsiklo agud kuhaon ang iya gamit apang dali-dali ini nga nagsakay sa iya motorsiklo kag nalagyo padulong sa distrito sang Molo.
Natigayon nga madakpan sang kapulisan si Poblacion apang ginbuyayaw kag gintuyo pa niya nga hampakon sang batuta ang arresting police officer.
Nakahunong na karon sa Police Station 1 ang suspetsado.
(photo from web)
