LTO-Pagadian mo-isyu na og Driver’s License nga pulo ka tuig ang validity

153

Pagadian City – Moisyu na karon ang District Office – Licensing Section sa Land Transportation Office (LTO) Pagadian City og driver’s license nga napulo ka tuig ang validity.
Kini ang gikomperma ni Johan Macaumbos, ang LTO-Pagadian District Chief ug kasamtangan nga Assistant Regional Director sa LTO-9, dihang nahinabi sa DXPR.
Sumala ni Macaumbos nagsugod na ang roll-out sa buhatan sa LTO sa syudad sa pag-apod-apud sa 10 ka tuig nga driver’s license apan iyang gipaklaro nga ang tanang mag-renew nga aplikante kinahanglang mopailawom sa Comprehensive Driver’s Education (CDE) aron makakuha og CDE Certificate.
Ang CDE Online Validation Exam dali nga magamit sa tanang aplikante nga libre sa LTO Portal (portal.lto.gov.ph) ug LTO offices pinaagi sa Driver’s Education Centers niini.
Ang pag-renew sa mga aplikante kinahanglang mopasar og labing menos 50 porsyento o 13 ka hustong tubag gikan sa 25 ka pangutana aron makuha ang sertipiko sa CDE.
Ang pag-renew sa driver’s license mokantidad lang og P585 alang sa on-time renewal sa standard professional ug non-professional nga lisensya.
Matud pa sa assistant direktor nga kon ang nag-renew nga aplikante adunay mga naunang kalapasan sa milabay nga lima ka tuig, mahimo ra silang hatagan og lima ka tuig nga driver’s license validity o mahimong moagi sa mandatory driver’s re-orientation course.

Facebook Comments