MARINA 6 – Wala pa sang kasiguraduhan kon san-o magabalik ang biyahe sang fastcraft Iloilo-Bacolod vice versa. Bangod sini, plano ni Maritime Industry Authority (MARINA) 6 Director Jose Venancio Vero nga estoryahon ang management sang mga Roro Vessels agud may masakyan ang mga regular passengers nga nagatabok Iloilo-Bacolod vice versa.
Pila sa mga options nga ginalantaw sang MARINA 6 amo ang mga masunod:
1. FASTCAT (RoRo vessel) – estoryahon ni Director Vero ang management sang Fastcat sa Lapuz terminal agud makapasakay sang regular passengers padulong sa Bacolod seaport
2. STARLIGHT – estoryahon ni Director Vero ang management sang Starlight nga nagabiyahe Iloilo-Bacolod-Batangas nga nagabiyahe “every other day” agud mangin re-inforcement sa mahimo sakyan sang regular passengers
3. RORO VESSELS SA DUMANGAS – estoryahon ni Director Vero si Governor Arthur Defensor Jr. agud pahanugutan nga makasakay ang mga regular passengers sa mga RoRo vessels
Nahibaluan, wala gihapon makabalik ang biyahe sang fastcraft Iloilo-Bacolod vice versa apesar sang “go signal” ni Mayor Jerry Treñas bangod nagapang-alang-alang ang mga fastcraft owners and operators.
Rason sang mga fastcraft owners and operators, kinahanglan nila nga magpasaka sang pamasahe bangod 50% capacity lang sang mga pasahero ang pahanugutan kon magbalik sila sa pag-operate. Dugang pa diri nga ang Negros Occidental kag Iloilo province nagapangayo sang RT-PCR result samtang wala naman sang madamo nga requirements ang Iloilo City kag Bacolod City.
