Menor de edad nga na-rescue nakatagamtam og abusong pisikal

Migawas na ang resulta sa medical examination nga gihimo sa mga doktor sa Southern Philippines Medical Center ngadto sa 6 anyos nga batang lalake human madiskubrehi nga adunay mga bun-og sa kalawasan atol sa gihimong rescue operation sa CSWDO, Barangay Officials ug DXDC RMN Davao public service team.

Base sa medical examination ang mga bun-og ug samad nga nakita sa likod ug tiyan sa 6 anyos nga anak ni Rhiza Bacullio mugna kini sa pisikal nga pagpangabuso o pagmaltrato kansang posible nga hinimuan sa mga kauban niini sa panimalay.

Nagkanayon si Gina Autida, head sa CSWDO Talomo district nga bisan ug dili na interesado mupasaka ug kaso ang inahan sa menor de edad pa-imbestigahan gihapon ang amahan ug iyang live in partner nga maoy kauban sa bata sa ilang pinuy-anan sa Bangkal, ning syudad sa Dabaw.

Gipaniguro ni Autida nga manubag ang amahan tungod sa gidangatan sa anak niiini nga nakasinati ug pagpangabusong pisikal bisan paman ug dili na interesado mupasaka ug kaso ang inahan tungod kay nagdali nga makauli sa Cagayan De Oro City kauban ang menor de edad.

Kahinumduman nga na-rescue ang menor de edad sa CSSDO, Barangay Talomo Officials ug DXDC public service team human mangayo ug tabang ang inahan aron mabawi ang bata gikan sa kustudiya sa iyang kanhi kapuyo nga si Darwin Mosqueda.

RadyoMaN Erin Lumosbog