Pulak gid ang isa ka ngipon sang bana pagkatapos nga naakig si misis sa iya pagpanglingling.
Suno sa report ni RadyoMaN Aldrin Soqueña kaina sa Targetanay sa Udto program, natabo ini sa Lapuz.
Wala sang liwan nga ginlingling ang bana kundi mismo ang nagahublas sini nga asawa samtang nagapaligo sa ila banyo. May buho sa dingding sang ila banyo gani didto ginpatapik ni mister ang iya kalimutaw.
Samtang si misis ang nagapamubo sang tubig, nasat-uman nya ang naga murarat nga mata sa buslot kag bangud nga wala na sang liwan nga tawo sa balay kundi ang iya man lang palangga nga bana, gintawag niya ini para idaho ang lugod pero may kaugot na nga nabatyagan bangud indi niya mahangpan ngaa nga linglingon pa ini sang iya bana.
Gintuman naman sang bana ang pangabay ni misis, gindala ang lugod sa sulod sang banyo kag pagdaho sang bato, ginpakang ni misis sa nagangirit nga bana kag naigo sa baba deretso sa ngipon nga ginkabangdan sang pagkapulak sang isa ka unto ni mister.
Lunsay mga manunudlo sa eskwelahan ang mag asawa gani wala na ginpa blotter pa ang natabo. Bangud sa iya sayop nga nahimo, balewala na kay mister ang pagkadula sang iya ngipon ukon unto kay ang pinaka importante subong nga indi madula ang misis sa iya luyo.
