Kalibo, Aklan — Parehong patay rong driver it motorsiklo ag tricycle matapos nga magsunggaban kabii sa national highway it Brgy. Linabuan Sur, Banga, Aklan.
Una nga ginbawian it kabuhi rong driver it tricycle nga si Goven Tabing, 39-anyos, Brgy. Tanod ag residente it Poblacion Lezo matapos nga makaangkon it patal nga lastro sa ueo.
Samtang rong driver it motorsiklo nga hasta sa makaron hay uwa pa makilaea hay ginbawian man it kabuhi samtang ginabueong sa Aklan Provincial Hospital bangud sa lastro man sa ueo.
Natabo rong aksidente matapos nga rong motorsiklo nag overtake sa ginasundan nga bus paadto it Banga ag sumunggab sa kasubeang nga tricycle halin sa Roxas City nga pauli eon kunta.
Padayon pa makaron rong imbestigasyon it Banga PNP angot sa nasambit nga insidente.
