ILOILO City – “Nabuta na ang gantangan, Sir. Kinahanglan na saplidon.”
Ini ang pahayag ni alias Kardo matapos madakpan ang Misis nga si alias Alyana nga upod ang kerido sini.
Suno kay Alias Kardo, tumandok sang Poblacion Vallehermoso, Negros Oriental, naglisensya ang iya asawa nga si Alias Alyana nga magpadulong sa Iloilo sang nagligad nga adlaw agud magprocess sang papeles nga kinahanglanon agud magtrabaho sa luwas sang pungsod.
Likom sa iya ihibalo, matapos nagpasugot ang bana sa iya hingyo, naghimos man si Kardo halin sa Negros Oriental kag nagpadulong diri sa Iloilo agud sundan ang asawa.
Antes diri, madugay na nga nahibaluan ni Kardo nga may iban nga lalaki si Alyana apang iya lang ginapalampas agud indi maguba ang ila pamilya kag para man sa ila kabataan.
Sadto, apesar nga may password ang cellphone sang asawa, aksidente nga nabuksan ni Kardo ang cellphone ni Alyana.
“Nahidlaw na gid ako sa imo Gha, palangga ta gid ka,” ang nabasahan nga text message ni Kardo sa cellphone ni Alyana halin sa kerido sang naulihi.
Sa panaysayon ni Kardo sa interview sang RMN Iloilo, ginbali niya ang simcard apang iya nahibaluan sa ulihi nga nagpabakal liwat snag simcard ang asawa kag nagbalik naman ang komunikasyon sini sa iya kerido.
Nagatrabaho bilang tricycle driver si Kardo.
Sang nagligad nga mga inadlaw, nabuksan man ni Kardo ang cellphone ni ALyana kag iya gintawgan ang numero sang lalaki.
“Hello gha, bugtaw ka na gha?” hambal sang kerido pagsabat sang telepono.
“Basi linaga!” sabat ni Kardo.
Didto na kag wala makasabat ang kerido ni Alyana.
Sa laktud, nakumpirmar ni Kardo nga may kerido si ALyana kag iya nahibaluan nga may anak pa sila nga lalaki nga nagaedad na sang 2 ka bulan.
Preso na karun si Alyana sa Lapaz PNP kag desidido man si Kardo nga magpasaka sang kaso batok sa iya.
Photo: Makita si alias Alyana nga ara sa sulod sang presuhan
