Davao city – Padayon nakatala ang National Labor Relations Commission Davao Region og mga kaso nga may kalabutan sa illegal termination sa mga kumpanya sa tibuok rehiyon onse sulod lang karong tuiga.
Sumala ni NLRC Davao Executive Labor Arbiter Elmer Ben Pasion nga sagad sa mga kaso nga ilang nadawat mao ang illegal termination uban sa underpayment of salaries ug non-payment sa labor standard services, ug daghan pang uban.
Sigun ni Pasion, nakatala na ang ilang buhatan og 380 ka kaso gikan sa buwan sa Enero hangtud Agosto karong tuiga kung asa 106 niini bag-ong mga kaso samtang ang 274 mga pending case.
Sa 380 ka kaso, 62 niini naresolba na niadtong buwan sa Agosto diin ang 318 nabiling mga kaso wala pa masulbad hangtud karon.
Nasuta nga sa 62 sa naresolba nga kaso, 37 na-settled kung asa 17 niini nadesisyonan samtang ang walo nahukman alang sa 86 ka trabahante nga nalambigit sa nasangpit nga mga kaso.
Namatikdan ni Pasion nga sa 74 porsiento sa 62 ka kaso nga naresolba mipabor ngadto sa mga mamumuo samtang ang 26 porsiento pabor sa Management sa mga kumpanya.
Nakatala sab ang NLRC Davao Region og 11 ka labor cases gikan sa mga Overseas Filipino Workers nga nagpaabot og mulo sa mao nga buhatan karong tuiga.
RadyoMan Joel Viray
