Pagserbisyo sa mga kasundaluan sa 8th IB sa mga hilit nga lugar sa Malaybalay, gihingusgan

Mas gihingusgan karon sa kasundaluan sa 8th Infantry “Dependable” Battalion, Philippine Army ang ilang pagserbisyo ngadto sa mga katawhan nga anaa nanimuyo sa hilit nga lugar ilabi na sa dakbayan sa Malaybalay.

Kini human nga narepair ang dalan nga magkonekta sa Sitio Bendum ug Sitio Nabag-o sa Barangay Busdi, Malaybalay City pinaagi sa pagtinabanga sa mga kasundaluan, kapulisan, ug katawhan sa maong barangay.

Ang unit sa 8th IB, PA, nagtumong nga maabot ang mga gikonsiderang Geographically Isolated and Disadvantaged Areas (GIDAs) pinaagi sa pagtrabaho sa mga kadalanan nga magkonekta sa mga Sitios aron nga sayon ang paghatud sa mga abot sa uma sa mga residente sa merkado.

Mapasalamaton si Nina Sigayan, Purok Chairwoman sa Sitio Bendum ngadto sa kasundaluan ug kapulisan sa pagtinabangay aron nga mahuman ang maong proyekto tungod kay mas mapasayon na ang ilang pag-agi ug ilabi na sa paghatud sa ilang mga produkto ngadto sa merkado.

Gisulti usab ni LtC. Anthony A. Bacus, Commanding Officer sa 8th IB, nga dili gayud sila muundang sa pagtabang sa mga katawhan sa maong barangay ilabi na sa mga hilit nga Sitio niini aron nga makab-ot ang hingpit nga kalinaw ug kausaban nga gitinguha sa tanan.