Pedestrians nabangaan og truck samtang patabok sa dalan, usa patay human malatayan

Davao City- Wala’y kabutangan ang kaguol ug kasubo sa pamilya ug kabanay sa 42-anyos nga babae nga taga Tibungco, Davao City human kini nakabsan og kinabuhi sa dihang nabangaan og prime mover truck sa Bunawan ning dakbayan, bandang alas 10 sa buntag sa October 25, 2023.

Sa Facebook posts sa igsuon og mga kaparyentehan sa biktima, gilayong wala nila damha ang kalit nga kamatayon sa ilang kapamilya tungod matud pa aduna lang kini gi-asikaso ug sila wala magtuo nga dili na kini makauli nga buhi.

Sa inisyal report nga gipadala sa DXDC RMN Davao gikan sa Bunawan Police Station, nasayrang ginasubay sa maong truck ang dalang Prk-5 Brgy. Road A1 Bud-bud, Bunawan pasulod sa national highway ug pag-abot sa gihitabuan sa disgrasya, aksidenteng nabanggaan ug nalatayan pa ang duha ka babaeng giingong nitabok sa kalsada.

Gisuwayan pa og tabang ang mga biktima apan gideklarang patay na ang usa samtang angol usab ang laing usa pa nga kasamtangang nagapaalim na karon sa Southern Philippines Medical Center (SPMC).

Nakakustodiya na sab sa Bunawan Police Station ang driver sa nakabanggang sakyanan alang sa tukmang disposisyon.

RadyoMaN Ivy Parido