Isip ayuda sa mga drug dependents nga membro sa Philippine Health Insurance Corp. (PhilHealth) nga ni-surrender ug gusto nang mobiya sa illegal nga bisyo sa ginadiling drugas, ang (PhilHealth)-7 nipahibawo nga mahimo nang ma-avail sa ilang mga miyembro ang “Medical Detoxification Package” niini.
Matod ni William Chavez, regional vice-president sa PhilHealth-7, nga kini maoy magsilbing unang lakang alang sa pagpa-rehabilitate sa mga tawo nga nagumon sa ilegal nga drugas.
Mobalor sa P10,000 ang mao nga package, diin aron maka-avail kinahanglan nga dunay referral sila gikan sa doktor ug nagpositibo sa drug test, ingon man, kinahanglan nga magpa-confine sila sa tambalanan.
Suma usab ni Dr. Israel Francis Pargas, Vice President for Corporate Affairs sa PhilHealth, nga sa pagkakaron sa mga pampublikong ospital lang mahimong ma-avail ang detoxification package ug sa mga rehabilitation facilities nga accredited sa Department of Health (DOH) ug narehistro sa PhilHealth.
Wala pa hinoo’y rehab centers nga nakaparehistro dinhi sa Sugbu sa PhilHealth.
Samtang kadtong mga drug dependents apan dili miyembro sa PhilHealth ang mahimo gihapong makapahimulos sa medical package, pinaagi sa Point of Care program sa PhilHealth, hilabi na niadtong mga pasyente nga gikan sa indigent nga mga pamilya.
