Sa pakighinabi sa DXDC RMN Davao kang PRO XI Spokesperson Police Major Catherine Dela Rey, iyahang gibutyag nga dili nila i-tolerate ang mga binuhatan sa kapulisan kung kini dili na ikaayo sa katawhan sama na lamang sa 177 ka mga pulis sa National Capital Region (NCR) kinsa nalambigit sa pagpananom og drug evidences, illegal arrest ug illegal nga pagpabuto og armas.
Hinuon giklaro ni Dela Rey nga walay mga pulis ang nagmasupakon sa balaod sa rehiyon onse.
“Perming reminders sa Regional Director sa Police Regional Office XI sa tanang PNP personnel nga dapat sa mga police operations namo ug sa tanang gina-conduct nga investigation dapat nasubay gyud pud sa amoang police operational procedure. Ug dapat subay gyud permi sa balaod. Dili sab ta naga-tolerate sa binuhatan nga illegal sa hanay sa PNP o sa kapulisan sa Davao Region,” segun ni Dela Rey.
Samtang sa karon gitutokan sa buhatan ang hugot nga implementasyon sa crime prevention kumpara sa crime solution.
Panawagan usab sa PRO XI sa mga station commanders nga kung adunay krimen sa ilang areas of responsibility, gikinahanglan masulbad kini og dali aron mahatagan og hinanaling hustisya ang mga biktima ug aron mabati usab sa komunidad ang ilahang presenya.
RadyoMaN Ivy Parido
