PSA-XI: Poverty incidence sa Davao Region miubos

Davao City – Luyo sa krisis hatud sa Coronavirus Disease 2019 (COVID-19) pandemic, nagkaubos gihapon ang poverty incidence sa Davao Region, subay sa datus sa Philippine Statistics Authority (PSA-XI).

Matud ni Wilma Guillen, Assistant National Statistician, PSA Social Sector Statistics Service, sa ilang datus sa Poverty Incidence Among Population, anaa sa 23.5% ang natala sa Davao Region niadtong 2015. Miubos kini sa 18.08% niadtong 2018, ug miubos pa ngadto sa 16.08% sa nakalabay nga tuig, 2021.

Sa Davao Region, kung basehan ang Provincial Poverty Incidence Among Population, pinakadaghang natala sa Davao Occidental nga anaa sa 30.8% niadtong 2018 ug mas mitaas sa 34.5% sa 2021. Gisundan sa Davao Oriental nga anaa sa 27.7% sa 2018 ug miubos sa 21.8% sa 2021, Davao de Oro nga anaa sa 18.6% sa 2018 ug miubos sa 17.7% sa 2021, Davao del Sur nga anaa sa 13.1% sa 2018 ug 13.0% sa 2021, Davao del Norte nga adunay 10.3% sa 2018 ug miubos sa 7.3% sa 2021.

Samtang pinakaubos ang natala sa Davao City nga anaa sa 6.2% sa 2018 ug miubos sa 5.1% sa nakalabay nga tuig.

“There’s an improvement even with the pandemic. Actually, there has been an improvement in the poverty situation of Davao Region,” sulti ni Guillen.

RadyoMaN Kirby Manzon

Facebook Comments