Davao City – Patay ang usa ka drug pusher human nakigpinusilay sa mga otoridad nga naglusad og buy bust operation sa may Muslim Village, Brgy. Ilang ning siyudad pasado 2:00 sa hapon.
Samad pinusilan sa nagkadaiyang parte sa lawas ang mitapos sa kinabuhi sa suspek nga si Wahid Sahlid “alyas Kining” 40 anyos, ug nagpuyo sa maong barangay.
Nasayran nga nakatimaho ang suspek nga pulis ang mipalit kaniya og shabu sa kantidad nga 500 pesos maong mibunot kini sa iyang .22 revolver dayon pamusil ngadto sa kapulisan.
Apan maayo na lang kay abtik nakalihay si Ernesto Abanto Jr kinsa nagsilbing posuer buyer ug abtik kini nakabalos og pusil resulta sa kamatayon ni Sahlid.
Gisuwayan pa og dala sa Southern Philippines Medical Center ang suspek apan gideklara kini nga dead on arrival sa doktor sa ospital.
Narekober gikan sa napatay’ng suspek ang upat ka laing sachet sa gituhoang shabu, pistola, mark money ug lakip na ang mga basyo sa bala.
Matud ni Sasa pnp Chief of Police Chief Inspector Reuben Libera, si Sahlid usa sa mga notadong nagpayuhot og droga sa iyang AOR ug taudtaod na gipanid ang illegal nga kalihukan niini.
Mapasalamaton si Libera sa mga tawo nga naghatag og impormasyon ngadto kanila labot sa illegal nga kalihukan sa suspek.
RadyoMaN Joel Viray
