Al-Barka Basilan- Ya expresa gratitud el mana residentes , especialmente el mana de baranggay Cambug con el 4th Special Forces Battalion bajo na Joint Task Force Basilan con el de estos esfuerso lleva con el diperentes mana grupo na diila lugar paraber dale el mana libre servicio medical, dental, tuli y ya dona mana equipo que ay utiliza na “play ground”, mana libro, ropa,chinelas, y ya conduci mana juego entre el mana bata del pasao dia na baranggay Magcawa, Al-barka.
Asegun con el CMO officer del 4th Special Forces Battalion 1Lt Ron Villarosa que el mencionao actividad parte lang del diila espuerso de obtener el Paz na provinica del Basilan, y el conducta del mencionao mana actividad na mana lugar que ralo lang ta puede recivi mana semehante ayuda un manera que ay puede sila saca el confiansa y supporta del communidad, Y por medio de este jende na mas asegun puede saca oportunidad el maga mal-elementos que embenena el pensamiento del mana jovenes para queda parte del de estos grupo para pelya contra con el govierno.
Omento di Villarosa, que mayoria del mana ya benificia con el mencionao actividad amo el mana residentes del brgy Cambug que conosido MILF community, donde mismo tambien el cuantos mana official concierne del MILF na mencionao lugar el ya aprecia con el mana ayuda especialmente el donacion del maga equipo para na play ground que ya dale el UP Upsilon Class 83′ led by Bgen Suchianco, que donde por primera ves ya tiene el diila lugar y ya experiencia el mana bata de jugar con este.
Ya recivi tambien mana libro, chinelas, ropa el mana bata, desde con el Children of War Basilan Association. Ya entretena tambien el mana bata con el mana juego que ya prepara el mana soldao desdel 19th Special Forces Company bajo na 4th Special Forces Battalion y del 18th Infantry Battalion.
Por su parte, el commandante del Joint Task Force Basilan Basilan BGen Juvymax R. Uy ya habla, que esperansao ay conduci sila semehante clase de actividad na mana otro lugar na provincial del Basilan especialmente na maga lugar mentao tiene precencia del maga mal elementos.
