Kalibo, Aklan — Nagpasa it resulosyon rong Sangguniang Bayan it Kalibo sa gin patigayon nga 51st Regular Session para nga mag pangayo it kopya it resulta ko imbistigasyon it Department of Environment and Natural Resources (DENR) para nga mataw-an it nagakaigo nga aksyon ag ma mentenar do kanami it Bakhawan Eco-Park samtang raya hay nakasara bangod nga may problema sa tunga ni Mr. Ariel Abriam ag kung KASAMA.
Nagpahayag man it sentimyento si SB Member Daisy Briones nga may kakueangan gidman rong Local Government Unit it banwang Kalibo sa pag suporta ag pag preserba it parke bangod nga una sa andang hurisdiskyon ro Bakhawan Eco-Park ag ha pabay-an it Local Government.
Gin paathag pa gid ni SB Briones nga rong intensyon it raya nga pag pasa it resulosyon hay para nga maprotektahan do Bakhawan Eco-Park bangod nga raya hay gin sara pagkatapos nga mag file it kaso si Mr. Abriam kuntra sa KASAMA pagkatapos nga may natabo nga pag eabag sa andang memorandum of agreement it daywang ka parte.
Pagahueaton pa kung Sangguniang Bayan do resulta it imbistigasyon ko DENR para mataw-an eagi it insigida nga aksyon ro nasambitan nga problema. Apang kun sin- ro mag daog sa pag kaeasuhan ni Mr. Abriam ag KASAMA ag kun kanyo pagapabuytan do Bakhawan Eco Park hay maga kasugot anay sa tunga it Local Government Unit it banwang Kalibo.
