Giila ang drayber nga nadala sa hospital nga si Francis Eric Balaba, 36 anyos, ug residente sa Purok-16, Barangay Sur, Don Carlos, Bukidnon nga nagmanehu sa usa ka Pink Mio 125 single motor samtang ang nabanggaan niining truck usa ka White Fuel Tanker Isuzu Truck, nagtangag og plakang numero ABK 6247 nga gimanehu ni Bryan Diso, 28 anyos, ulitawo, ug residente sa Purok-5, Tubod, Carmen, Davao Del Norte.
Sumala sa report sa kapulisan, nagdagan gikan sa south nga bahin ang maong single motor sa dihang pag-abot sa lugar, gumikan sa kakusog sa dagan, wala niini mabantayi ang nakaparadang tanker hinungdan nga nabanggaan kini.
Nakaangkon og grabeng pangos ug bun-og sa kalawasan ang drayber nga daling gidala sa balay-tambalanan.
Luwas ra hinoon ang kahimtang sa biktima ug kasamtangang gapaalim sa mga nahiagoman niini.
Giturn-over usab sa Don Carlos Municipal Police Station ang mga nalambigit sa aksidente lakip na ang drayber sa truck alang sa tokmang disposasyon.
