Sa interview sa RMN Malaybalay ngadto kang LtCol. Eric Dima-ala, Commanding Officer sa 88th IB, gibutyag niya nga namatikdan sa tropa ang maong mga armadong grupo sa usa ka barong-barong sa bukirong bahin sa maong lugar, rason nga gipaulanan kinig bala sa tropa.
Mga miyembro sumala pa sa SRSDG Peddler sa Sub-Regional Committee (SRC-2) sa North Central Mindanao Regional Committee (NCMRC) ang maong mga armado.
Dugay na matud pang ginamonitor sa kasundaluan ang maong grupo human ang engkwentro nga natigayon sa nakalabayng semana batok sa laing mga unit sa Philippine Army.
Miagi na matud pa sa mga lugar sa Quezon, ug San Fernando ang maong hugpo sa NPA ug nakabalik sa Cabanglasan rason nga nasapon sa kasundaluan.
Dako usab og tabang sumala pa ni LtCol. Dima-ala ang taho sa mga concerned citizens kabahin sa presensya sa grupo sa lugar hinungdan sa gihimong strike operation.
Wala ra matud pay natala nga casualty sa bahin sa kasundaluan samtang posibleng adunay mga samaron sa bahin sa NPA human nga nakit-an ang mga patak sa dugo sa area sa engkwentro diin narekober ang usa ka AK-47 rifle ug usa ka M1 Garand Rifle.
