Davao City – Usa ka dakung hagit sa atong modernong panahon karon mao kining malampusong pagbugtaw ug paghikutar sa hinabing pangkalinaw haron mabatonan nato ang malahutayon, malungtaron ug masaligang kalinaw ug haron motunhay ug matawhay na sa hingpit kining atong katilingban.
Responsibilidad nato nga motampo sa kaya natong mahatag nga asistinsya diha sa peace process sanglit ang kalampusan nato sa maong adbokasiya kita man gihapon unya ang makabenepisyo.
Alang nako, dili importante ang lugar kun venue sa peacetalks – mamahimong denhe sa Pilipinas o sa abroad, ang kritikal mao nga adunay negosasyon nga mahitabo sanglit ang pagsugod sa deliberasyon mao man unya ang magsilbi nga pasiunang yawe sa posibleng kasulbaran sa burukang taudtaud nang nagsi-ak sa Pilipino batok sa kapwa-Pilipino.
Daghang mga ehemplo sa kalibutan nga mamahimo natong himoong giya diha sa peace negotiations: Pwede natong himoong gabayan ang peace agreement didto sa Great Britain kuyog sa Irish Republican Army kun IRA.
Mamahimo usab natong kadangpan alang sa mga matulun-anon kaayong leksyon sa negosasyon mao ang eksperyensya sa nasud sa Colombia ubos kang Pres. Juan Manuel Santos uban sa mga rebelde ubos sa landong sa grupong FARC kun Revolutionary Armed Forces of Colombia – People’s Army.
Ang punto mao nga kritikal ug mahinungdanon kaayo nga sugdan na gilayon ang hinabing pangkalinaw. Kun asa paingon ug kun asang dapita mosangko ang hisgot-hisgot, mag-agad na kana sa goodwill ug sinseridad sa mga naglingkod sa negotiating tables.
RadyoMaN June Duterte
