Davao City – Sakit palandungon nga kalakip niadtong nahilambigit sa mga krimen karong panahona mao ang atong mga kabatan-onan.
Inay nga motutuk sa ilang pagtungha sa linghud pa kaayong pangedaron, anaa na man hinoon ang uban taliwala kun nahitumpawak sa kinabuhing dinautan.
Subo hunahunaon nga imbes pagpangga ug pagmahal ang ilang ma-eksperyensyahan, nagtubo na man hinoon sila sa kasuko ug kaligutgot ngadto sa ilang isig-kaingon, nahigot sa kinabuhi ilawom sa bisyo, pagpasagad ug kriminalidad, way rumbo o way direksyon, sayo nga mahimong padre de pamilya o batan-ong inahan nga kulang gane sa ensaktong oportunidad alang sa usaka hamugaway nga kinabuhi sanglit wala man ma-tono ang ilang tagsa-tagsa ka mga kahimtang.
Alang nako, gikinahanglan gayud nato nga mohimo’g lakang haron salbaron ang mga batan-on gikan sa perdisyon ug ka-alaotan.
Angayang mapundar nato ang mas lig-on nga mga programa alang sa produktibong kinabuhi sa atong mga youth, oportunidad sa pagtungha kun pag-eskwela ingon man available nga mga scholarships or educational assistance haron mahaw-as nato sila sa kamangtas sa kalsada ingon man dautang barkada ug mabutang sa lig-ong sitwasyon diin cierto or segurado ang ilang maayong kaugmaon.
Usa usab sa matawag nato nga urgent action mao ang pag-amyenda kun pagrebisa gilayon sa Juvenile Justice Law taliwala sa impresyon nga nahimo kining ‘convenient scapegoat’ aron ang batan-on maka-ikyas sa criminal responsibility.
Labaw sa nga tanan, mobalik gyud ‘ta ani’s pamilya: Kun haguka ang banay sanglit huyang ang pundasyon nga gi-montar sa ilang mga ginikanan, klaro gayud nga motuyhakaw unya ang usaka ‘dysfunctional family.’
Aron walay magdaku nga tawong kriminal, tahas sa pamilya nga protektahan ang batan-on sa tanang dautang impluwensiya sa kalibutan. Kargo kini sa banay: Responsibilidad nga dili gayud nato pwedeng isangun ngadto sa uban, ngadto sa gobyerno or estado or ngadto lamang sa mga manakupay nga mga awtoridad.
The family is the surest sanctuary of the youth, never the streets.
RadyoMaN June Duterte
