General Santos City–Padayon pang gipangita sa kapulisan sakop sa Police Station 5 ang suspetsadong panday nga Joseph Galagate, nga taga Purok Banualan, Tambler Gensan suspek sa pagpanigbas patay sa seaman nga si Melchor Coronado, legal age, residenti sa maong lugar.
Sumala ni Spo1 Ronald Guardados, imbistigador sa Police Station 5 nga sa karon wala pa sila masayod hain na nagtago-tago ang suspetsado. Nasayran nga una nang natigbasan sa suspek ang seaman nga si Coronado gumikan lang sa lalis sa sweldo.
Dugang pagbutyag ni SPO1 Guardados nga basi sa sitwasyon sa biktima human kining gitigbas patay, makit-an gyud nga hilabihan kasuko ang gibati sa suspek batok sa nahisgutan.
Nasayran nga puno ug mga samad tinigbasan ang nahisgutan gikan sa iyang ulo, agtang ug naputol ang mga kamot niini. Sa kasamtangan ginaandam na ang kasong ipasang-at batok sa suspek human sa salaod nga iyang nahimo.
