May isa na ka bata ang hinablos nga babaye nga kilalahon ta lang kay “Angel”, 23 anyos. Disgrasyada ini kag ginsapopo sang iya nga tiyo, ginpadayon sa balay kag ginabuligan sa mga kinahanglanon sang iya bata.
Ang la-on nga tiyo naman masobra na 40 ang edad kag nalingaw na sa pagbulig sa iya hinablos. May paandam na sa babaye nya nga hinablos nga indi anay mag nobyo kay basi masulit naman ang natabo sa iya nga binlan lang sang lapsag kag palagyuhan na naman.
Apang ang paghigugma indi gid mapunggan kon igu-on ka sang pana ni kupido wala sang mahimo ang isa ka tawo kundi sundon ini.
Naka nobyo gid si Angel, tawgon naton sya kay “Piolo”. Seryoso gid sya kag handa nga updan sa pagpangabuhi si Angel bisan ano man ang matabo. Nakahibalo ang mga ini nga ginabawal sang tiyo sang babaye nga makipag relasyon ini sa isa ka lalaki.
Kagab-i lang gid sa distrito sang Jaro, sa balay sang tiyo, nagkadto ang nobyo kay natabuan nga wala ini sa balay kag ang hinablos lang ang ato didto.
Sa balatyagon nga indi mapunggan, natabo ang indi dapat matabo, nagsantik ang panit kag nagkambod ang mga balahibo sang magkahagugma. Nagpakighilawas sila sa balay sang iya tiyo.
Likom sa ihibalo sang duha, nag abot ang tiyo nga wala nila matalupangdan. Nakita gid sang iya duha ka mata ang natabo, nagkuha sang kutsilyo kag ginbuno ang nobyo kag naigo sa kilid sang balikawang.
Gindala sa West Visayas State University Medical Center ang nobyo kag nagapabilin pa asta subong. Ang tiyo naman nakagwa na sa prisohan kay wala naman sang plano nga magpasaka sang kaso ang biktima nga nobyo.
(Base sa max na max balita ni Kasamang Aldrin Soqueña)
