Davao City- Gikondena karon sa Office of the Presidential Adviser on the Peace Process (OPAPP) ang gihimong mga pagpangatake sa Communist Party of the Philippines-New Peoples Army (CPP-NPA).
Sa press statement, hugot nga gikondena ni Presidential Peace Adviser Carlito Galvez, Jr. ang pagpatay sa Malayag Guerilla Front sa NPA kang tribal leader Datu Sammy Diwangan atubangan mismo sa iyahang 9 anyos nga anak sa Barangay Canangaan, Cabanglasan, Bukidnon niadtong January 4.
Subay sa report, gilantaw nga motibo sa pagpatay ang pagsupak niini sa mga recruitments nga ginahimo karon sa CPP-NPA sa ilang mga komunidad.
Matud ni Galvez, aron nga mapadayon ang gilaraw nga peace talks, gikinahanglang sinsero usab ang NPA.
“For the peace negotiations to happen, there is a need to create a conducive environment where both parties can face each other, confident that each one will keep their word, and most importantly, no innocent lives will be lost. In short, we must walk our talk,” matud pa sa peace adviser.
Nanghinaut si Galvez nga undangon na sa NPA ang pagpang-atake sa mga tropa sa gobyerno, ipadaplin usa ang ilang mga armas ug tapuson ang pagpangilkil, rape ug pagpangguba sa mga pampubliko ug pribadong pasilidades.
RadyoMan Aimee Guinita
