Upat ka mga indibidwal nasapon nga nag pot session, duha dakpan, laing duha nakaikyas

Nadakpan sa mga kapulisan ang duha ka mga indibidwal human nga naaktuhan nga nag pot session samtang laing duha pa ang nakaikyas sa gilusad nga operasyon pasado alas 3 sa hapon adtong Martes, Hulyo 11, 2023 didto sa Purok-4, Libertad, Quezon, Bukidnon.

Giila ang mga dinakpan nga silang Ronald Llagas, 38 anyos, ug mga residente sa naasoy nga lugar samtang ang mga nakaikyas nailang sila Ken Jade Manera, hingkod ang pangidaron, ug si Rene Sulade, ug mga residente sa Poblacion, Quezon, Bukidnon.

Nakadawat sumala pa og report ang kapulisan kabahin sa nahitabong Pot Session sa pinuy-anan sa usa sa mga suspek maong dali kining gi-operasyon.

Narekober gikan sa posesyon sa mga nadakpan ang upat ka mga pakete sa gituohang drogang shabu nga mutimbang og 0.07 gramos ug mukantidad og 500 ka pesos lakip ang mga nagkadaiyang drug paraphernalia.

Gikustodiya karon sa Quezon Municipal Police Station ang mga nadakpang suspek samtang giturn-over ngadto sa PNP Bukidnon Provincial Forensic Unit ang mga nakompiskang ebidensya alang sa tokmang disposasyon.

Kasong paglapas sa RA 9165 o ang Comprehensive Dangerous Drugs Act of 2002 ang atubangon sa mga dinakpang suspetsado.