ILOILO City – 5 ka rifle grenade kag tatlo ka rocket distress signal ang nakita sang barangay tanod nga si Jun Gentapao sa Mabolo-Delgado, City Proper, pasado las nueve kahapon sang aga, Pebrero 20.
Suno kay Gentapao, daily routine na niya ang magpaninlo sa lugar kag kahapon iya nakita ang granada nga nabutang sa karton kag natungtungan sang basura.
Ginpahayag naman ni Police Senior Inspector Hurdan Bacalangco, chief sang Explosives and Ordnance Division -K9 sang Police Regional Office 6 nga delikado ang narecover nga granada kag rocket distress signal bangod posible pa ini nga maglupok.
Subong man, ginpahayag ni Bacalangco nga posible indi man pagpangbomba ang tuyo sang nagbilin kundi manginwala lang nga siya ang tag-iya sang mga explosives bangod sa nagapadayon nga Comelec gun ban.
Gin-athag man ni Bacalangco nga wala sang threat sa syudad bangod kumpleto pa sa safety pins ang mga narecover nga explosives kag wala sang patimaan nga palukpon ini.
