1.8 milyones ka pesos nga Early Warning Device panahon sa baha, naka-instalar na sa dakbayan sa Malaybalay

32
Mukabat sa 1.8 milyones ka pesos ang kantidad sa bag-ong instalar nga early warning system sa dakbayan sa Malaybalay panahon sa pagbaha.

Sa pamahayag ni Alan Comiso, Chief sa City Disaster Risk Reduction and Management Office (CDRRMO)-Malaybalay atol sa gipahigayong Media Kapihan Forum adtong Biyernes, didto sa People’s Hall sa City Hall Malaybalay, gibutyag niya nga na-instalar na ang bag-ong warning system panahon sa pagbaha ning siyudad.

Matud niya nga ang bag-ong warning system nahimutang kilid sa sapa sa Barangay 10, Barangay 11, ug Barangay 8 ning dakbayan.

Ang maong warning system matud pa mu-alarm kung mutaas ang lebel sa tubig panahon sa mga pag-ulan.

Gawas nga magamit isip warning device, mapuslan usab matud pa ang maong kagamitan sa mga public announcement nga muabot sa 2-kilometros ang radius niini sulod sa dakbayan.

Dugang pa nga mamahimo rang i-set manually pinaagi sa cellphone ang maong warning device ilabi na panahon sa baha, sunog, ug uban pang kalamidad.



Ginahulatan nalang sa karon nga maturn-over ngadto sa CDRRMO-911 ang maong warning device nga maoy magdumala niini.

Ang maong warning device matud pa nahilakip sa mga programa, proyekto, ug aktibidades sa buhatan karong tuiga.

Facebook Comments