Nagalab-ot sa 108 ka mga pamilya sa Brgy. Esperanza, Koronadal City nga apektado sang pagbaha ang ginpabakwit tungod sa pagbubo sang mabaskog nga ulan kahapon nga adlaw. Ginkumpirmar ni Kapitan Edgar Cabardo nga 26 ka mga balay ang naanod sang tubig baha. Samtang ginpademolished niya naman ang 54 ka mga balay bilang kabahin sang ginpatuman nga force evacuation. Suno kay Kapitan Cabardo, nagaistar ang mga ginpabakwit nga mga residente sa kilid sang Mani river sa bahin sang Purok Pag-asa kag Purok Roxas. Sa subong suno kay Kapitan Cabardo temporaryo nga nagatinir ang mga apektado nga residente sa Brgy. Plaza. Samtang may pauna naman suno pa nga ayuda nga ginhatag ang local government unit sang Koronadal kag iban pa nga ahensya sang gobyerno sa mga apektado nga pamilya. Nagapanawagan naman si Kapitan Cabardo sa mga luyag nga maghatag ayuda sa mga apektado nga pamilya sang pagbaha tungod posible madugayan pa ang mga ini sa Brgy. Plaza tubtob nga wala pa sang relocation site para sa ila.
Facebook Comments
