10TH ID gisayangan sa estudyante nga napatay sa engkwentro human misulod sa kalihukan

Davao City – Nasubo ang 10th Infantry “Agila” Division Philippine Army sa kamatayon sa usa ka estudyante ug kanhi Secretary General sa Bayan Eastern Visayas ug Kanhi Chairperson sa University of the Philippines Visayas Tacloban Campus College Student Council kinsa misampa sa kalihokan ug napatay sa enkwentro tali militar sa bukirang bahin sa Barangay Mabini, Catarman, Northern Samar niadtong Mayo 28,2023.

Sa pamahayag ni 10th ID Spokesperson Army Captain Mark Anthony Tito atol sa pakighinabi sa DXDC RMN DAVAO kaniya nasayangan kini sa kinabuhi ni Joshua Sagdullas ug naila sa Alyas Miyong sa kalihokan kay kung wala pa unta kini nagpadala sa nag-recruit niini sa mga militante dili unta kini makasulod sa pagka-NPA ug mamatay sa engkwentro.

Matud ni Tito, ang nahitabo kang Sagdullas usa ka dakong kamatuoran nga ang pag-apil sa militanteng pundok walay maayong ikamugna sa kinabuhi sa mga kabataan kay gub-on niini sa sayop ug dunot nga idolohiya sa teroristang komunista ang kaugmaon ug kinabuhi sa mga estudyante nga malingla nila.

Sigun ni Tito, maayo nalang sa rehiyon onse ug sa ubang bahin sa sulod sa hurisdiksiyon sa 10th ID Philippine Army daghan sa mga kabataan ang naluwas sa kasundalohan gikan sa kamot sa ilang mga recruiters ug dili na sab makapasaya-saya ang mga militante sa pag-recruit sa mga kabataan sa mga eskwelahan.

Pahimangno sa opisyal sa mga ginikanan ug labaw na sa mga estudyante nga pilion ang ilang sudlan nga organisasyon ug likayan ang paghugoy-hugoy sa mga recruiter nga dunay koneksiyon sa teroristang CPP NPA NDF.

RadyoMaN Joel Viray