11 million nga planta sa virgin coconut oil sa Kiamba pormal gi-inagurahan

General Santos City–Pormal nang gi-inagurahan ni Sarangani Gov. Steve Solon uban ang representante sa namatay nga si Gina Lopez ang mukabat sa kapin kon kulang 11 milyones nga kantidad sa virgin coconut oil plant sa Barangay Kling Kiamba Sarangani Province alas 11:00 ang takna sa buntag, kagahapong adlawa.

Sumala pa ni Governor Solon nga dako kining tabang sa mga lumulupyo sa maong lugar tungod kay ug pormal na kining magsugod sa ilahang produksyon daghang mga residente sa maong barangay ang makabinipisyo niini pinaagi sa ilahang mugnaon nga cooperative.

Dugang pa ni Gov. Solon nga gawas sa Provincial Government ug ang usa ka foundation, partner usab nila ang Philippine Coconut Authority pinaagi sa pag bansay sa mga mamahimong trabahante sa maong planta. Samtang mga himan nga gamiton gikan matud pa sa PCA.


Gipaniguro usab niini nga mamahimong taas ang kalidad sa mga produkto nga ma-produce sa maong planta nga mao man usay ipa-ilaila sa Kiamba ug Sarangani Province nga produkto sa ubang lugar.

Gilauman nga sa musunod nga tuig magsugod na ang produksyon sa maong planta kung asa sa mga musunod nga adlaw ipa-ilawom na sa training ang mga trabahante niini.

Sa karon aduna na matud pay duha ka mga virgin coconut oil nga planta ang Sarangani province una ang sa kiamba ug sunod nga ablihan ang iyaha sa munisipyo sa Malapatan.(Dave Silagan)

Facebook Comments