12 anyos napalgang patay sa creek sa Barangay Sibulan, Toril

Davao City – Sa hilit, kasagingan ug perting mingawa nga dapit sa Barangay Sibulan Toril, Davao City napalgang wala nay kinabuhi ang usa ka 12 anyos nga babayeng menor de edad.

Gibutyag ni Police Major Jonnel Bonguyan, Eden Police Station Commander atol sa interbyu sa RMN Davao, posibleng gilugos ug gituok ang biktima base sa mga bun-og nga nakita sa iyahang liog.

Sa inisyal nga imbestigasyon, nisalmot sa kalingawan sa pista ang biktima ug sa balay sa iyahang apohan na kini natulog, niadtong Disyembre 3, 2022 adlawng Sabado.

Sumala sa hepe, nihawa kini sa balay sa iyahang apuhan alas 6:00 sa buntag adlawng Dominngo, Disyembre 4, 2022 aron mupauli na sa ilahang pinuy-anan apan wala na kini makauli pa nga buhi sa ilaha.

Patay na kining nakita sa usa ka 10 anyos, sa may creek diin anaa 300-500 metros gikan sa gitulogan niining balay sa iyahang apuhan. Bandang 11:30am nareport kini sa kapulisan.

Gibutyag ni Bonguyan, gilantaw nila nga adunay posibilidad nga giatangan kini sa wala pa mailhing suspek una buhata ang pagpatay. Nakigalayon karon ang kapulisan sa barangay kapitan sa mas gipalawmang imbestigasyon. Ipailawom usab sa awtopsiya ang patay’ng lawas niini nga gidala sa Angel Funeral Homes sa Toril.



Nanawagan si Bonguyan sa mga katawhan o kinsay nakakita sa nahitabo aron masolbad ang krimen ug matunol ang hustisya sa gituohang gilugos ug gipatay nga menor de edad.

RadyoMaN Aimee Guinita

Facebook Comments