Tagum City – Kasong syndicated Estafa subay sa Presidential Decree No. 1869 ug paglapas sa Republic Act (RA) 11332 o “Mandatory Reporting of Notifiable Diseases and Health Events of Public Health Concern Act , ang atubangon sa 19 ka personahe o miyembro sa Kingdom Gospel International Tribal Common Wealth Kingdom Ministry Inc. sa Pioneer Avenue, Tagum City, Davao del Norte nga gi-raid sa mga awtoridad niadtong Miyerkules (Mayo 26, 2021).
Laing tulo (3) usab ka tawo ang gidakop tungod sa pagbabag sa operatiba sa kapolisan aron dakpon ang mga suspetsado.
Sa interbyu sa DXDC RMN Davao kang Police Major Joselito L. Tan Jr., Chief of Police sa Tagum City Police Office, gibutyag niini kagahapong adlawa (Mayo 27, 2021), gipasaka ang ilang kaso uban ang mga ebidensya nga nakuha sa ilang opisina lakip na ang giingong pledge money nga anaa sa kapin P60,000.
Matud ni Tan, nagdasok ug wala natuman ang social distancing sa opisina rason nga usa usab kini sa kaso nga ilang atubangon diin anaa sa 100 ka tawo ang ilang naaktohan atol sa operasyon.
Padayong gipanawagan sa kapolisan nga dili motuo sa mga easy money sama sa mga insidente kaniadto nga mga investment scams sa dakbayan.
“Akong reminder sa katawhan nga walay easy money nga magsulod ka’g kwarta, walay kay buhaton, magpaabot ka. Dili lang ‘ta magtuo ana kay nailad na ‘ta kadtong panahon sa 2019 – KAPA, Rigen,” panawagan ni Tan.
Nasayran nga affiliated sa KAPA (Kabus Padatoon) ang maong Kingdom Gospel inay pay in, pledge ang tawag sa ilang ginahatag nga 10% nga kwarta aron makuha ang imong kapital nga gi-invest kaniadto sa KAPA.
RadyoMaN Kirby Manzon
