Dumalinao, Zamboanga del Sur – Patay ang driver lakip na ang angkas niini human nagkabangga ang ilang gisakyang single motorsiklo ngadto sa usa ka Bongo sa alas 9 ang takna kagabie sa National Highway sa Purok Santan, Brgy Locuban Dumalinao, Zamboanga del Sur.
Usa ka motorsiklo Skygo Hero, color pula ug itom adunay temporaryong plaka numero 0901-0327292 gimaneho ni Jonathan Aporado Timbawas, 17 anyos, ulitawo, estudyante, ug residente sa Purok Kaymito, Brgy Anonang, kauban sa iyang angkas nga si Marvin Timbawas Gandamon , 16 anyos, ulitawo, estudyante ug residente sa Purok Avocado, Brgy Buenavista, Pagadian City.
Samtang ang ikaduhang vehikulo usa ka UV Mazda Titan Bongo, color pula nagtangag sa temporaryong plaka numero 090102 nakarehistro ubos sa pangalan ni Dexter Dalisay taga Mampang , Zamboanga City ug gimaneho ni Mark Anthony Amija Embores, 30 anyos, minyo, ug residente sa Purok A, Brgy Lumbayao, Kabasalan, Zamboanga Sibugay.
Sa imbestigasyon sa kapulisan sa Dumalinao gibutyag nga ang single motor nabyahe gikan Dumalinao, ZDS paingon unta Pagadian City apan pag-abot sa kurbadahong bahin (sa dapit nahitabuan) matud pa nga ang driver sa Bongo nga gikan sa managkalahing direksyon nagkabanggaay sa single motor.
Sa gikusgon sa impact, ang driver sa single motor namatay dihadiha dayun samtang ang angkas niini daling gidala ngadto sa Hamellarin Hospital, Pagadian City apan gideklara kini nga patay na.
Dili na usab mahitsura ang atubangan sa bongo samtang walay naangkon nga samad ang driver.
Ang driver gidala sa kapulisan sa Dumalinao alang sa tukmang disposasyon.
