2nd batch sa pag-export og “igat” sa Davao padulong China, nagmalampuson

Davao City – Nagpadayon ang pag-eksport sa eel kun “igat” gikan sa Pilipinas padulong sa China human malampusong napadala ang ikaduhang batch nga mokabat sa 1.5 tonelada.

Kini nagtimaan sa padayon nga pag-uswag sa high-value aquaculture product nga gikan sa Mindanao, ilabina sa Bukidnon.

Sa tabang sa Department of Agriculture sa Davao Region ug Bureau of Fisheries and Aquatic Resources, malampusong napadagan ang eksport sa Maylong Enterprises Corporation, usa ka kompanya nga nakabase sa Davao. Nasaksihan usab kini ni Chinese Consul General Zhao Xiuzhen, nga mipakita sa lig-on nga trade partnership tali sa duha ka nasud.

Bisan pa sa mga hagit sama sa logistics ug kakulang sa pasilidad, nanghinaut ang mga mag-uuma nga mas mapalig-on pa ang suporta sa gobyerno, ilabina sa pagpasayon sa laboratory testing aron makunhuran ang gasto sa transportasyon ug mapaspas ang proseso sa pag-eksport.

Sumala sa DA-11, ang padayon nga eksport nagpakita sa dakong potensyal sa aquaculture sa Mindanao aron mapalapad ang merkado ug madugangan ang kita sa mga mag-uuma ug mangingisda.

RadyoMaN Kareen Beltran