Tigbao, Zamboanga del Sur – Wala na madala sa balay tambalanan ang usa ka babaye nga menor de edad nga tinun-an sa Nilo Elementary School human nabangil sa ligid sa mazda bongo kagahapon sa National Highway nga sakop sa Brgy. Maragang, Tigbao, Zamboanga del Sur.
Sumala sa report nga gipadangat sa Tigbao Municipal Police Station nakahiagom og bali sa parte sa kalawasan si Rhea Mea Saniel Dequito, 7 anyos, residente sa naasoy’ng dapit nga maoy hinungdan nakabsan kini sa kinabuhi pasado alas 11:00 sa udto.
Usa ka Mazda Bongo color green ng nagtangag sa plaka 090104 ang nakaligis sa biktima nga gimaneho sa negosyanteng Kismar Daud Hadjirul ,26 anyos nga taga Alicia, Zamboanga del Sur.
Matud sa taho sa kapolisan nga padulong sa Zamboanga City ang sakyanan apan pag-abot sa dapit nahitaboan wala makabantay ang driver nga nikalit paglabang sa kalsada ang biktima hinungdan nga siya nadasmagan ug nalatayan sa ligid.
