Kalibo, Aklan — Uwa eon kaabot pa nga buhi sa Aklan Provincial Hospital rong sangka 9-anyos nga ungang eaeaki matapos nga maeomos sa Aklan River nga sakop it Sitio Libtong, Estancia, Kalibo kaina.
Ro biktima nakilaea kay DAUD PEDRO ag residente it Brgy. Andagao, Kalibo.
Suno kay Mr. Anthony Zubiaga sambilog sa mga ginpangayuan it bulig ag nag eonip sa suba para makita rong unga nga kapin sa tunga sa oras ro anang eonip tag mahulikapan nana rong siki it unga sa idaeom it tubi sa idaeom it Kalibo – Mobo bridge ag ana dayon nga ginbira paibabaw.
Insigida sanda nga nag tawag it rescue ag pag-abot hay gin revive ro unga pero uwa eon raya naga response rason nga gindali-dali daea sa hospital pero gindeklara man raya nga patay.
Nahaadto ro nasambit nga unga sa suba matapos nga magsaeampitan sanda ko ana pang mga kaibahan nga sanday Ronel ag Donald nga magpaligos.
Samtang idto eon sanda hay gusto it biktima nga magpaligos gid sa madaeom rason nga raya naeomos.
Gintinguhaan man ko anang mga kaibahan nga buligan pero indi nanda kaya ay madaeom rason nga nagpangayo sanda it bulig sa mga tawo sa lugar.
