Abogadong inmate, nagtanyag ug free legal advice sulod sa bilangguan

Malaybalay City, Bukidnon – Daw nabalhin ang opisina sa usa ka abogado sa sulod sa selda sa Bureau of Jail Management and Penology kon BJMP human nga nagtanyag kini libreng legal advice sa iyang mga kaubanang inmates.

Sa interview sa RMN Malaybalay ngadto kang Atty. Alvy Damasco, gibutyag niini nga ubay-ubay na matud pa niyang kaubanan sa sulod ang iyang natabangan. Dako matud pa nga oportunidad kining iyang gihimo ilabina sa mga nangutana sa dagan sa ilang mga kaso.

Libre matud pa niya kining gitanyag sanglit gi-isip na matud pa niyang mga igsoon ang naa sa sulod sa selda.


Sukad nga naabot siya sa city jail, mukabat na sa 100 ka mga inmates ang iyang natabangan.

Matud ni Atty. Damasco nga kasagaran gayod sa pangutana sa mga inmates kung nganong dugay kaayo ang hearing sa ilang kaso.

Gipasabot matud pa niya nga tungd sa war on drugs, dili ma-accommodate tanan tungod sa kagamay ra sa korte sa probinsya sa Bukidnon maong gibahin-bahin ang higayon sa korte nga nagresulta sa pagkalanga sa hearing kon pagdungog sa ilang kaso.

Gidugang pa sa abogadong inmate nga boluntaryo niya kining gihimo aron malamdagan ang mga binilanggo sa dagan sa ilang kaso ug aron dili mawad-an ug paglaom.

Kahinumduman, nga boluntaryong nisurender si Atty. Damasco, 41 anyos, nga taga Brgy. 7, Malaybalay City kaniadtong Setyembre 27, 2017 human nga nagpagawas ug warrant of arrest si Hon. Mirabeaus A. Undalok, Assisting Judge sa Regional Trial Court, 10th Judicial Region, Branch-8, City sa Malaybalay City batok kang Damacso tungod sa kasong murder.

Nasayran nga usa si Damasco sa suspek sa pagpatay kang Atty. Pepito Suello kanidtong tuig 2015.