ROXAS CITY – Pilason ang lima ka mga persona matapos nagbunggu-anay ang 2 ka closed van sa Barangay Tugas, Mambusao, Capiz mga alas 7:25 kaina sang aga. Nag-angkon sang pilas sa nagkatuhay nga bahin sang lawas ang mga biktima nga sanday Rene Boy Dalipe 37- anyos sang Barangay Naslo, Pototan, Iloilo driver sang closed van kag Juan Apsay 60-anyos sang Barangay Tugas, Mambusao, Capiz.
Pilason man si Roger Soldano sang Marikina City, Metro Manila kag ang helper sini nga si Leonardo Insoy. Madugay nga nakuha si Insoy bangud naipit ang tiil sini sa nagkalagupi nga ulo sang truck.
Base sa imbestigasyon sang Mambusao PNP, nagikan sa syudad sang Iloilo kag padulong sa Caticlan, Malay, Aklan ang closed van nga ginamaneho ni Soldano. Pag-abot sa national highway sang Tugas nadulaan sa kontrol ang manibela sang amo nga closed van rasun nga nagbunggo ini sa nawala nga bahin sang sa closed van nga ginamaneho ni Dalipe.
Bangud sa mabaskog nga impact sang pagkabunggo, nagti-og ang van ni Dalipe kag nag-igo ini sa kahoy. Nadalahig man sa nasambit nga insidente ang naka-park nga tricycle kag ang isa pa ka biktima nga si Sulpicio Longares 64-anyos nga naigo sang pila ka parte sang truck.
*(Photo: *CAPIZ Emergency Response Team
